TRIALS AND TRIBULATIONS OF OUR PEOPLE!🌊

TRIALS AND TRIBULATIONS OF OUR PEOPLE!🌊

நாங்கள் அம்பாறையில் காலடிவைக முன்னரே அவசர மீட்புப்பணிகளை விசேட அதிரடிப்படையினரும் (Special Task Forces-STF) செய்திருந்தனர்.

அவர்களுடன் இணைந்தும் தனித்தும் அம்பாறை கஞ்சிகுடிச்சாறு பகுதியில் நிலைகொண்டிருந்த தளபதி இராம் தலைமையிலான புலிகளும் மக்களை இயற்கையின் சீற்றத்திலிருந்தும் காக்க தமை அர்பணித்துக் கொண்டிருந்தனர்.

அலைக் கரங்களால் எமை அடிக்கடி மெல்லெனத் தாலாட்டிய கடலன்னையின் சீற்றம் எமை நிலைகுலைய வைத்தது.

கடல்படு செல்வமெல்லாம் காலகாலமாக அள்ளி வந்து தந்த மீனவர்கள் மடியில் பேரிடி வீழ்ந்தமை பார்க்கவொண்ணாதிருந்தது.

கோரமாக இறந்த எமது மக்களின் உடல்கள் எல்லா இடங்களிலும் சிதறிக் காணப்பட்டது.

இராட்சத அலைகளால் விசிறி எறியப்பட்டிருந்த பாலுக்கு அழுதிடும் பாலகரும் பேச்சு மூச்சடங்கி இருந்தமை மானுடத்தின் பேரவலம்.

ஆண்டவன் மீதும் ஓர் வெறுப்பு உணர்வை ஏற்படுத்தியது.

யாழ் மருத்துவபீட விரிவுரையாளர் ஒருவரும் மருத்துவபீட மாணவர்களும்
மருத்துவ உதவிகள் உட்பட தங்களால் இயன்ற எல்லா உதவிகளையும்
மக்களுக்கு செய்துகொண்டிருந்தனர்.

அவர்கள் பிரதானமாக திருக்கோவில்,கோமாரி,பொத்துவில், சின்ன உல்லை, பெரிய உல்லை பகுதிகளை நோக்கி தமது மகத்தான சேவைத் தொடர்ந்தனர்.

மருத்துவபீட மாணவன் காண்டீபனும் கவிஞர் தூயவனும் துரிதமாக செயல்பட்டு முகாம்களின் எண்ணிக்கை, அண்ணளவாக ஒவ்வொரு முகாம்களிலும் உள்ள மக்களின் எண்ணிக்கை மற்றும் அவற்றின் அமைவிடங்கள் போன்ற விபரங்களை விரைவாக திரட்டினார்கள்.

இப்போது இரு பிரிவுகளாக செயல்படுவோம் என்று தூயவனும் விரிவுரையாளரும் முடிவெடுத்தார்கள்.

இரு பிரிவுகளாக பிரிந்து செயலில் ஈடுபட்ட போது வினைத்திறனும் அதிகமாய் இருந்தது.

நடமாடும் மருத்துவ சேவையில் ஈடுபடும் போது ஆங்காங்கே கட்டட இடிபாடுகளுகிடையிலும் சிறிய நீர்நிலைகளிலும் இருந்து மீட்கப்பட்ட உடல்களை உள்ளூர் வாசிகளினதும்
ஶ்ரீலங்காப் பொலிசாரினதும் உதவியுடன் அடையாளம்கண்ட பின் அவ்விடத்திலேயே புதைத்தோம்.

திருக்கோவில் பிரதேசத்தில் முன்னாள் பாராளுமன்ற உறுப்பினர் மாமனிதர்
அரியநாயகம் சந்திரநேருவும் தென்கிழக்கு பல்கலைக்கழக விரிவுரையாளர் திரு.குணபாலன் அவர்களும் எங்களின் மானுடநேயப் பணிகளுக்கு நல்ல ஒத்துழைப்பு வழங்கியிருந்தார்கள்.

இரு பிரிவுகளாக பிரிந்து முகாம்களுக்கு செல்வதற்கு இன்னுமொரு வாகனம் தேவைப்பட்டது. உடனே தனது வாகனத்தையும் தந்து எமது சாரதியாகவும் வந்தார் முன்னாள் பாராளுமன்ற உறுப்பினர் சந்திரநேரு அவர்கள்.

இரு பிரிவுகளாக பிரிந்து செயல்ப்பட்டும் பல்வேறு நோய்களுடனும் சிறுகாயங்களுடனும் பல்வேறு முகாம்களில் தங்கியுள்ள மக்களின் மருத்துவத் தேவைகளைப் பூர்த்தி செய்யமுடியவில்லை.

நன்றாக விபரங்கள் திரட்டிய பின் நான்கிற்கும் அதிகமான நடமாடும் பிரிவுகளை உருவாக்கினோம் எனினும் மருத்துவ உபகரணங்கள் ,மேலதிக மருந்துகள் எம்மிடம் இல்லை.இப்போது அப்பிரதேச சுகாதார வைத்திய அதிகாரியைத் தேடினோம். ஒருவாறு MOH இன் வீட்டைத் தேடிப்பிடிதோம். தெய்வாதீனமாக அவர் வீட்டில் உயிரிழப்பு இல்லை ஆனால் ஊரில் ஏற்ப்பட்ட பேரழிவின் அதிர்ச்ச்யில் இருந்து அவர் விடுபடவில்லை.

துயர் அறிந்து வெளிநாடுகளில் இருந்து ஓடோடி வந்த எமது எமது மக்களும் ஐந்தாவது அல்லது ஆறாவது நாட்களில் எம்முடன் இணைந்து கொண்டனர்.அவர்களில் பெரும்பாலனவர்கள் வைத்தியர்கள்.

பேரிழப்பை சந்தித்த மக்களுக்கு
Post-Traumatic Stress Disorder (PTSD) ஏற்படாது தடுபதற்குரிய வேலைகளில் கூடிய கவனம் செலுத்தினர்.

கனடிய இராணுவ வைத்தியர்கள் வந்தவுடன் முகாம்களில் உள்ள எமது மக்களின் குடிநீர்ப்பிரச்சனை தொடர்பாக பேசினோம்.

ஒக்ஸ்பாம் பணியாளர்களுடன் இணைந்து செய்து தாகசாந்தி செய்தனர்.

உதவிப்பணியாளர்களின் எண்ணிக்கை அதிகரிக்க அதிகரிக்க கூடுதல் வாகனங்கள் தேவைப்பட்டது.

இந்நிலையில் வவுனியா மன்னார் பகுதியில் கண்ணிவெடி அகற்றும் பணியில் ஈடுபட்டுக்கொண்டிருந்த FSD நிறுவனம் தமது நோயாளர்காவுவண்டிகளைத் தந்ததுடன் நின்றுவிடாது வைத்தியர் ஒருவரையும் Paramedics இனரையும் தந்து பேருதவி புரிந்தனர்.

தமிழர் புனர்வாழ்வுக்கழகத்தினர் மக்களின் பெருமளவான உணவு, உடை போன்ற அடிப்படைத் தேவைகளை நிவர்த்தி கொண்டிருந்தனர்.

அம்பாறை மாவட்டத்துக்கான தமிழர் புனர்வாழ்வுக்கழகத்தின்பணிப்பாளர் ஆதவன் மிகவும் திறம்பட செயல்ப்பட்டுக் கொண்டதோடு எங்களின் வேலைத்திட்டங்களுக்கும் பக்கபலமாகவும் இருந்தார்.

அக்கரைப்பற்று விபுலானந்த கல்லூரி முகாமில் தங்கியிருந்த மக்களில் பெருமளவானோர் குடும்ப உறுப்பினர்களை ஆழிப்பேரலையால் இழந்தவர்கள்.

அவர்களின் சொல்லோன துன்பங்களை கேட்க எங்களால் தாங்கமுடியாமல் இருந்தது நண்பர் Dr.பி.கதிர்மகன்/ஜொன்சன் அவர்களின் அருகிருந்து ஆறுதல் வார்த்தை கூறிக்கொண்டிருந்தார்.

ஆனால் அன்று இரவு எங்களுக்கு கிடைத்த சொற்ப நேரத்தில் கூட அவரால் தூங்க முடியவில்லை.

1978ஆம் ஆண்டிலும் புயல்காற்று மற்றும் பெருமழை காரணமாக வெகுவாகப் பாதிக்கப்பட்ட போதும் வடக்கில் இருந்த உறவுகள் குறிப்பாக இளைஞர்கள் வந்து மீட்புப் பணிகளை செய்ததாகவும் பின்னர் அவர்களில் பலர் போராளிகளாக மட்டக்களப்பு அம்பாறை மண்ணில் உலா வந்ததாக பெரியவர்கள் சொன்னார்கள்.

அவர்கள் எங்களிடம் நன்றிப் பெருக்குடன் கூறினார்கள்

அந்த நன்றிக்குரியவர்கள் நாங்கள் அல்ல என்பதை அம்பாறைத் தமிழ் பேசும் மக்களுக்குச் சொன்னோம்.

அந்த நன்றிநவிலல்
தமிழர் தேசத்தில் முன் வைத்தியசாலைப் பராமரிப்பை(Pre-Hospital Care) உருவாக்கிய மருத்துவத் தாய்க்கு உரியது.

யார் அந்த மருத்துவத் தாய்?

வைத்தியக் கலாநிதி பத்மலோஜினி கரிகாலன் அவர்களே மருத்துவத்தாய் ஆவார்.

என்பது(80s)களில் அரச உயர் பதவியை தூக்கி எறிந்துவிட்டு தீவிர பொது வாழ்வில் ஈடுபட்டவரே அந்த நன்றிக்கு உரியவர்.

ஆம், அவரே எங்களை உருவாக்கியவர்.🙏